فكرة التطبيق قائمة على تقديم أهم الحسابات السريعة اللى بتساعد المشتغلين فى تصميم المحطات وتشغيلها ، وزى ما قلت لحضراتكم الفكرة لسه فى بدايتها وانا حابب أكمل فيها بناءا على المقترحات بتاعتكم ، والفكرة بقالنا فترة فى بالى واللى حفزنى أنى ابدأ هو المنتدى هنا لأنه بيقدم معلومات وبيانات عن معادلات التصميم والتشغيل للمحطات و فكرت أننا ممكن نجمع البيانات دى كلها فى تطبيق واحد على التليفون بشكل بسيط مش متخصص زى ما قلت لحضراتكم حسابات سريعة والأقسام اللى أنا تصورت أنى ابدأ بيها كالتالى :
ولا : حسابات الكيماويات
بمعنى أدق حسابات نسبة ال حقن dosing فى على خط مياه والحسابات الحالية بتقدم المعلومات اللازمة للمشغل وليس للكيميائى بمعنى أن الحسابات دى بتبدأ بعد ما اخوانا الكيميائية يحددوا نسبة الحقن المطلوبة فى الخط ( target ppm) ومن خلال التطبيق المشغل هيقدر يحسب هو محتاج يحط كمية قد ايه من الكيماويات وبنسبة تخفيف قد ايه سواء سائل او مسحوق
يعنى مثلا لو أنا فى محطة والمعلوم عندى هى كمية المياه فى الخط ، والتركيز المطلوب بعد الحقن ، و طلمبة الكلور الموجودة فى المحطة وبالطبع نوع الكيماويات أو السائل ونسبة تركيز المادة الفعالة التطبيق ده هيساعدنى فى انى احدد بناءا على نسبة التخفيف انا محتاج كام لتر من خزان الكيماويات فى الساعة وبالتالى ضبط طلمبة الحقن على نسبة كام من التصرف بتاعها وكمان التطبيق بيحسب الكمية اللى المحطة هتستهلكها فى الوقت المحدد بمعنى لو انتهى عاوز تعرف كمية الكيماويات المطلوبة خلال فترة معينة وليكن شهر وتقيم انته محتاج تشترى كيماويات قد ايه او الكمية اللى عندك فى المخزن تكفى كام يوم
الحسابات دى برضه هتساعدك لو بتصمم محطة جديدة عشان تختار طلمبات الحقن بتصرفات مناسبة لنسب الحقن ، كمان هتساعدك فى اختيار سعة خزانات الكيماويات المناسبة لاستهلاك يوم واحد أو عدد ساعات معينة عشان لو اخترت حجم الخزان صغير هاضطر لعمل محلول كتير خلال اليوم او الوردية ، ولو اخترته كبير ممكن المحلول يفضل فى خزان الكيماويات وقت طويل يأثر على تركيزه زى خزانات العيلة مثلا .... كمان التطبيق هيخليك تختار الخزانات والطلمبات بشكل مناسب فى حالة الكيماويات البودر عشان نحدد نسبة الكيماويات المضافة لتانك الكيماويات بحيث متوصلش لمرحلة التشبع أو يبقى المحلول فيه نسبة حبيبات تأثر على طلمبة الحقن وممكن توصل للسدد
مثال بالنسبة للمشغل :
لو عندى مادة كيميائية فى شكل سائل وعاوز احقن منها خط بيمر فيه كمية ٢٥٠ متر مكعب من المياه ، والمفروض يكون التركيز بعد الحقن 2ppm من الحساب ، من مواصفات المادة الكيميائية الموجودة بالمحطة هنعرف كثافة المادة دى ( ممكن تتحسب بقسمة وزن الجركن على حجمه ) ولتكن المادة ٢٥ ك جرام فى جركن ٢٢ لتر هيبقى كثافتها ( ٢٥ ÷ ٢٢ = ١.١٣ كجم/ لتر ) ، و بمعرفة تصرف طلمبة الحقن واختيار كمية المياه وساعات الحساب البرنامج هيحدد لى درجة التصرف من طلمبة الحقن ودى اهم نقطة لانى ممكن تلاقى الرقم ده قليل فتحتاج اغير نسبة التخفيف أو التقى أن الرقم اكبر من تصرف طلمبة الحقن فتحتاج أنى اقلل نسبة التخفيف ....
نفس الكلام لو عندى مادة بودر هاقدر احدد 8 محتاج كام كيلو من الكيماويات اللى الماده الفعالة لها تركيز معين فيها واحطها على كام لتر مياه عشان تعطى القيمة المستهدفة مع التصرف المناسب لطلمبة الحقن.

كمان فى حالة تغيير نسبة الحقن المطلوبة أو درجة التخفيف أو تغيير المادة الكيميائية بمادة تانية تركيز المادة الفعالة فيها مختلف أو حتى تغيير طلمبة الحقن بواحدة تانيه تصرفها مختلف عن الاولى بسبب عطل كل ده المشغل مش هيحتاج أنه يعمل حسابات جديدة
ده بالنسبة للكيماويات وطبعا الموضوع قابل للتطوير وإضافة حسابات تانيه تساعد فى الشق الكيميائى للمصمم أو المشغل

رابط التطبيق
Ro pre-design